| | | |

• Inici
• [ca]
• [es]
• [eu]
• [en]
• [fr]
• [de]
• [it]

• Quen somos
• Órganos de goberno
• Áreas e servizos: directorio
• Modelo da cooperación

Quen somos

A Deputación de Barcelona é unha institución de goberno local que impulsa o progreso e o benestar dos cidadáns e cidadás no seu ámbito territorial: actualmente, a provincia de Barcelona, 311 municipios en rede, actúa directamente a prestar servizos e, sobre todo, en cooperación cos concellos.

Forma parte do ámbito da Administración local, a máis próxima á cidadanía.

Misión: servizos locais de calidade

A Deputación de Barcelona ofrece fundamentalmente apoio técnico, económico e tecnolóxico aos concellos para que poidan prestar servizos locais de calidade de forma máis homoxénea en todo o territorio. Coordena servizos municipais e organiza servizos públicos de carácter supramunicipal.

Modelo de traballo: «Rede de Concellos»

A Deputación de Barcelona desenvolve o traballo en rede cos concellos. Isto supón traballar xuntos para compartir obxectivos e crear máis benestar que chegue a todo o territorio, e tamén para mellorar a calidade dos servizos, o saber facer dos profesionais e difundir as boas prácticas.

Tamén significa sumar esforzos, información e recursos para aumentar o seu rendemento: máis e mellores servizos cos recursos existentes. E optimizar os recursos humanos, técnicos e materiais, ao aplicar economías de escala, ao compartir coñecementos e ao evitar duplicidades de estruturas.

A «Rede de Concellos» da Deputación de Barcelona baséase na administración dixital e potencia así mesmo a utilización das novas tecnoloxías no ámbito local.

Máis preto e máis benestar para as persoas:
os valores institucionais

As deputacións, como órganos da administración local xunto cos concellos, son as administracións máis próximas e que mellor coñecen as realidades territoriais e as necesidades da poboación. O deseño dos servizos desde a proximidade pode ser o máis axeitado e eficiente para facer chegar máis benestar a todas as persoas.

Poboación e territorio

O noso ámbito territorial representa o 24% do total da superficie de Cataluña e o 74,4% do total da poboación catalana.

	Superficie (km2)	Poboación (hab.)	Densidade (hab./km2)
Barcelona	7.719	5.416.447	701,7
Cataluña	32.113	7.346.078	228,7
España	505.992	46.157.822	91,2

Fonte: INE, datos de xaneiro de 2008.

De onde vimos

A Deputación de Barcelona é herdeira da que se constituiu no ano 1836, como resultado da división de España en provincias prevista na Constitución de Cádiz de 1812. lnicialmente exerceu competencias en materia de obras públicas, ensino secundario, beneficencia e funcións intermedias entre os municipios e o Estado.

A presidencia de Enric Prat de la Riba (1907-1914) fixo rexurdir a Deputación cun ambicioso proxecto de creación de infraestruturas básicas que desembocou na creación da Mancomunidade de Cataluña. Esta institución, suprimida pola ditadura de Primo de Rivera en 1924, levou a cabo en dez anos unha tarefa de modernización do país.

A Constitución de 1978 recoñece a autonomía da Administración local (os concellos e as deputacións) e é neste contexto que a Deputación de Barcelona exerce a súa misión mediante a cooperación cos concellos.